للقدر كلمة اخري الجزاء الثالث
للقدر كلمه اخرى 3
المهم قاعده كده اتذكرت الجامعه طبعا انا اكبر واحده في اخواني وانا من قريه صغيره في الجزيره لما امتحنت تالته جبت 82.9 وقدمت للجامعه هنا في الخرطوم شالوني بنوك وتمويل في جامعه كبيره كان عندي اسكرتين و4 بلوزات بمشي بيهم السنه كلها وفي شلة بتاعة بنات ظاهر عليهم مرتاحات وبنات عز النوع المنفتح جدا كانو بعلقو علي ويسمعوني الكلام في اضاني انو ما عندي هدوم خصوصا في اول سمستر في الجامعه اتفوقت عليهم الحمد لله انا ملامحي جميله جدا و شعري طويل وما ناقصني حاجه وما كنت مجتهده في نفسي شديد واهم من كده الرضا والقناعه كنت مقتنعه وراضيه بأي حاجه فكرت قلت ارسل لي امي مليون لانها عايشه اخواني بالبسيط براها من بيع الاسكريم و الكسره وابوي خلى لينا حواشه مؤجرنها بالسنه وضعنا كان صعب شديد واخواني في المدارس وقلت الباقي اشتري بيهو اي حاجه ناقصاني المهم قولت امي ما حتسكت وحتسالني جبت القروش من وين لانو كانو برسلو لي حاجه بسيطه ما كانوعندي رد لو سألتني ما قدرت ارسل ليها منهم يلا شلت القروش وما مشيت السوق كانت 3 مليون في 2008 حاجه كتيره انا طالعه من بيت عمو شوفت محلات في الرياض فيها ملابس حلوه شديد قلت حاشتري منهم وامشي لي عم حسن اشوفو دخلت المحل ولأول مره ادخل محلات زي دي اشتريت ملابس راقيه شديد وكتيره من كم محل كفوني باقي السنه كلها واشتريت اربعه جزم وشنط و عطور ومكياج واي حاجه نفسي فيها وما قادره اشتريها واشتريت لي موبايل سمح كنت شايله ربيكا شلت حاجاتي وكنت فرحانه بيهم شديد ومشيت فرجتهم لي عم حسن لقيتو كويس قاعد بره في الجنينه بتاعت البيت وشربت معاهو شاي المغرب واتونست معاهو وطلع الألبوم فرجني على صور اولادو وبناتو من صغار لحدي ما كبرو و لعبت معاهو شطرنج علمني ليهو و كان بتونس معاي ويضحك من جوه قلبو وحسيت بيهو متحسن طبعا في واحده بتجي يومين في الاسبوع تطبخ جات طبخت وزكية بتسخن الاكل وبتختو لي عمو قمت دخلت معاها المطبخ ظبت العشاء واكلتو بي يدي ما عارفه كنت حاسه بيهو حنين شديد على نظرتو ابتسامتو وانا برضو حسيت انو انا مسؤوله منو وربنا سخرني ليهو عشان انسيهو زعلو من اولادو اتعشينا وبلع الحبوب و خليتو بحضر في التلفزيون وبقيت اقول ليهو بابا حسن وهو بقول لي بتي ودعتو وقلت ليهو كل يوم حاجيك ان شاء الله ساعه واحده وضرب لي السواق يوصلني شلت حاجاتي ومشيت بيت ناس خالتي وكنت شايله اكياس كتيره اول ما دخلت كلهم اتلمو فيني دا شنو الفي الاكياس دي قلت ليهم ملابس قامت خالتي جرت واحد من الاكياس وفتحتهم لقتهم فعلا ملابس وبقت تكورك جبتيهم من وين يا فاجره بعتي نفسك عشان هدوم ولا عملتي شنو اعترفي وما سكتت ساعه بتتكلم يجبوكم تقرو وتجو تفسدو وتبيعو شرفكم قالت لي اسي الوقت اتأخر بكره من الصباح انا بضرب لي امك اوريها الحاصل شنو بكيييت من كلامها واتهامها لي وقلت ليها بقلبي الله يسامحك ودخلت المطبخ اشرب مويه لقيت منيره وهاجر بتكلمو قالت ليها جابت الحاجات دي من وين شيله عديل قالت ليها تكون جرت الظلط عاينت ليهم وسكت مشيت دخلت حاجاتي في الشنطه تحت السرير و دقيت لي امي سلمتةعليها واطمنت عليهم ورقدت نومت وفي الصباح ......
ليست هناك تعليقات:
إرسال تعليق