للقدر كلمة اخري الجزاء الثاني
للقدر كلمة اخرى 2
يلا بعد رجعنا البيت قال لي السواق حيوصلك لحدي البيت دخلت المطبخ عملت ليهو شوربة دجاج و سلطه وفي كوفته جاهزة حمرتها وعصير برتقال وحنستو تحنيس للأكل واكل وبلع الحبوب وشرب العصير وفتح الخزنه اداني قروش كتيره رفضت اشيلهم قولت لي مقابل شنو يعني نحن اتفقنا انت ابوي وانا بتك اصر علي انو اشيلهم وقال لي المرتين الشوفتك بي العبايه دي امشي اشتري هدوم واشتري اي حاجه نفسك فيها بعد اصرار شديد شلتهم عندهم واحده شغاله حبشيه اسمها زكيه وصيتها عليهو وقلت ليها خلي بالك منو وانا بجي بكره عاينت لي باستغراب يعني انتي منو قلت ليها انا بتو لي عمو حسن قالت لي انا بشتغل هنا تلاته سنه مافي زول بجي زياره بابا عايش هنا وحيد قلت ليها تاني مافي وحيد يلا السواق جا وصلني الكلاكله بي عربيه لاندكروزر v8 الناس كلها بتعاين في العربيه نزلت في بداية الشارع كان الساعه 11 مشيت برجولي لحدي ما وصلت البيت لقيتهم قافلين الباب وعارفني انا لسه ما جيت بدق في الباب قريب نص ساعه جات فتحت لي الباب خالتي وشاكلتني وقالت لي اتاخرتي وين كنتي مع منو انا ما بستحمل مسؤليتك بكره حاضرب لي امك تشوف ليك صرفه مني قولت ليها كنت مع واحده صاحبتي عيانه في المستشفى وماىعندها زول غيري المهم ما صدقتني قالت لي حدو قريب دخلت الغرفه لقيت بنات خالتي بحضرو في المسلسل هم اربعه وكلهم اكبر مني قلت السلام عليكم ودخلت قلت ليهم ما سامعين الباب واقفه لي نص ساعه قامت الكبيره اسمها هاجر قالت لي ماىعندنا بنات بجو الساعه 11 قلت ليها اخرتني ظروف المهم غيرت ملابسي وكنت خاته هم اخت شنطتي وين وفيها 3 مليون وهم متعودين بفتحو شنطتي طوالي وبكره صابح الجمعه قمت قسمتهم ختيتهم في جيوب الاسكيرتات وخالتي قالت لي الغدا انتهى في قرع حق امس في التلاجه لو دايره سخنيهو قلت ليها ما جعانه وصليت العشاء ختيت ورقدت نومت صحيت الساعه 5وربع صليت الصبح وقعدت استغفر وهم طبعا بنات خالتي ما بصلو ابوهم لما يشوفني بصلي بجي يشاكلهم ويقومهم للصلاه يطنطنو وينبذوني بي تحت تحت جات منيره دي بت خالتي بعد الكبيره طبعا كلهم اتخرجو من الجامعه وقاعدات في البيت قالت لي انتي جايبه لينا الهوى ما ضرووري تصلي في وقتو بقيت بعاين ليها كده 😕😕 وكلهم يحمرو لي ويمشو قلت ليهم بي قلبي لو ما مجبوره ما بقعد معاكم
انتظرووو الجزاء الثالث
ليست هناك تعليقات:
إرسال تعليق